web analytics
Thursday, June 24, 2021

ម្ខាងរុស្ស៊ី​ ម្ខាងអាមេរិច ម្ខាងចិន ម្ខាងទៀតអូស្ត្រាលី​ ! តើនរណាជាម្ចាស់វ៉ាក់សាំង​ កូវីត១៩ ពិតប្រាកដដែលអាចជួយសង្គ្រោះពិភពលោកពីជំងឺរាតត្បាតនេះបាន?

ជំងឺកូវីត១៩​ ដែលគេដាក់ឈ្មោះឱ្យថា​ « ជំងឺរាតត្បាតជាសកល » ​បានធ្វើពិភពលោកភ័យខ្លាច និងរអារជាខ្លាំង​ដោយសារតែវាជាវីរុសដ៏កាចសាហាវ​​ ងាយឆ្លង​ ថែមទាំងប៉ះពាល់ដល់ផ្លូវដង្ហើម​រហូតធ្លាក់ដល់សភាពធ្ងន់ធ្ងរប្រសិនជាមិនបានធ្វើការព្យាបាលទាន់ពេលវេលា​​។​

បើគិតចាប់ពីថ្ងៃឆ្លងរាលដាលនៃវីរុសនេះ​ដំបូង មកទល់ថ្ងៃនេះ​ មានរយៈពេល១ឆ្នាំពេញហើយ កូវីត១៩ បានវាយលុកចូលដល់ប្រទេស និងដែនដីសរុបចំនួន ២១៥ហើយនៅទូទាំងសកលលោក ដោយសាយភាយនៃការឆ្លងវីរុសនេះពាសពេញទ្វីបទាំងអស់លើកលែងតែទ្វីបទឹកកកអង់តាក់ទិកមួយប៉ុណ្ណោះ ថែមទាំងបានចម្លងទៅកាន់មនុស្សសរុបចំនួន ៥៧,៣៥០,២៦៣នាក់ ដែលក្នុងនោះអ្នកជំងឺចំនួន ១,៣៦៧,៧៣១នាក់បានស្លាប់បាត់បង់ជីវិត និង ៣៩,៨២៥,៨២៦នាក់ផ្សេងទៀត ត្រូវបានព្យាបាលឲ្យជាសះស្បើយឡើងវិញនៅទូទាំងសកលលោក។

ទោះកូវីត១៩ មានអាយុកាល១ឆ្នាំហើយក៏ដោយ​​ តែក៏មិនទាន់មានវិធីសាស្ត្រណាមួយជាក់លាក់អាចព្យាបាលជំងឺនេះនៅឡើយនោះទេ​ ហេតុដូច្នេះហើយបានជាប្រទេសមហាអំណាចមួយចំនួនបានងាកមកស្រាវជ្រាវនៃការផលិតវ៉ាក់សាំងវិញដើម្បីបង្ការការឆ្លងរាលដាលបន្ថែមទៀត ​ដោយក្នុងនោះ មានប្រទេសធំៗ៤ បានប្រកាសជាផ្លូវការថា ខ្លួនមានលទ្ធភាពរកឃើញវ៉ាក់សាំងកូវីត១៩​បានយ៉ាងជោគជ័យទៀតផង។

ប្រទេសទាំង៤​ ដែលអះអាង និងតាំងខ្លួនថាផលិតវ៉ាក់សាំងកូវីត១៩ ជោគជ័យ មានដូចជា​៖

១​.​​ ប្រទេសរុស្ស៊ី

កាលពីខែសីហា​​ ឆ្នាំ២០២០ ប្រទេសរុស្ស៊ីបានដាក់ឈ្មោះវ៉ាក់សាំងកូវីដ១៩ ដែលខ្លួនរកឃើញជាលើកដំបូងថា Sputnik V​ដោយរដ្ឋាភិបាលរុស្ស៊ីបានឱ្យដឹងថា ប្រទេសរុស្ស៊ីទទួលបានការ​បញ្ជាទិញវ៉ាក់សាំងកូវីដ១៩​​ពីប្រទេសជាង២០នៅទូទាំងពិភពលោក ​ដែលមានចំនួនរហូតដល់ទៅ ​១ពាន់លានដូស​។​ នៅក្នុងនោះសូម្បីតែប្រធានាធិបតីរុស្ស៊ី លោក វ៉្លាឌីមៀ ពូទីន បានប្រកាស​ និងអះអាងថា កូនស្រីរបស់លោកបាន​ចាក់វ៉ាក់សាំងនេះរួចហើយ​ប្រកបដោយជោគជ័យទៀតផង។

ប៉ុន្តែបើទោះបីជាយ៉ាងណាក្តី អ្នកវិទ្យាសាស្ត្រជាច្រើន​​នៅទូទាំងពិភពលោក មិនទាន់អាចផ្តល់ការទុកចិត្តទាំងស្រុង ទៅលើវ៉ាក់សាំងរបស់ប្រទេសរុស្ស៊ីនេះនៅឡើយទេ។

២. ​ប្រទេសចិន

កាលពីថ្ងៃទី​១៩​ ខែវិច្ឆិកា​ ឆ្នាំ២០២០ ប្រទេសចិនបានអះអាងថា មនុស្សជិត ១លាននាក់ហើយ ទទួលបានការចាក់វ៉ាក់សាំង COVID-19 ដែលត្រូវបានអភិវឌ្ឍឡើងដោយ ក្រុមហ៊ុនផលិតឱសថចិន សាយណូផាម (Sinopharm)។ ដោយកាលពីអំឡុងខែមិថុនា និងកក្កដា ចិនបានចាក់វ៉ាក់សាំង COVID-19 ដែលខ្លួនបានអភិវឌ្ឍនោះ ទៅលើបុគ្គលិកជួរមុខផ្នែកសុខាភិបាល និងមន្ត្រីពាក់ព័ន្ធដទៃៗទៀត ក៏ដូចជាទៅលើក្រុមនិស្សិតចិន ដែលត្រូវទៅបន្តការសិក្សា នៅក្រៅប្រទេសផងដែរ។

តែយ៉ាងណា វ៉ាក់សាំងទាំងនោះ មិនទាន់បញ្ចប់ការធ្វើតេស្ត ដើម្បីបញ្ជាក់ពីសុវត្ថិភាព និងប្រសិទ្ធភាពរបស់វាទាំងស្រុងនៅឡើយទេ។

៣. សហរដ្ឋអាមេរិច

នៅថ្ងៃទី២០​ ខែវិច្ឆិកា ឆ្នាំ២០២០នេះ​ ក្រុមហ៊ុនអភិវឌ្ឍឱសថដ៏ធំរបស់អាមេរិក Pfizer ក្រោមកិច្ចសហការជាមួយក្រុមហ៊ុន បាយអូអិនធិច (BioNTech) របស់ប្រទេសអាល្លឺម៉ង់ បានប្រកាសឲ្យដឹងថា ពួកគេបានដាក់ពាក្យស្នើសុំការអនុញ្ញាតជាបន្ទាន់ សម្រាប់ការប្រើប្រាស់វ៉ាក់សាំងកូវីដ-១៩ របស់ខ្លួន ទៅកាន់រដ្ឋបាលចំណីអាហារ និងឱសថអាមេរិក(FDA)។ ដោយក្រុមហ៊ុនទាំងពីរ ថែមទាំងបានគូសបញ្ជាក់ថា ពួកគេអាចបឹងទទួលបានអាជ្ញាប័ណ្ណ សម្រាប់ប្រើប្រាស់វ៉ាក់សាំង ទៅលើក្រុមដែលមានហានិភ័យខ្ពស់ នៅចុងខែធ្នូខាងមុខនេះតែម្តង។

ក្រុមហ៊ុន ទាំង២នេះ ក៏បានប្រកាសថា លទ្ធផលថ្មី នៃការវាយតម្លៃចុងក្រោយ ទៅលើការធ្វើតេស្តវ៉ាក់សាំងកូវីដ-១៩ រមានប្រសិទ្ធភាពរហូតដល់ ៩៥% និងមិនមានផលប៉ះពាល់ណាមួយ ត្រូវបានរាយការណ៍ទេ។

Vaccine and syringe injection. It use for prevention, immunization and treatment from corona virus infection (novel coronavirus disease 2019, Covid-19). USA Flag background.

៤.​ ប្រទេសអូស្ត្រាលី

ប្រទេសអូស្ត្រាលី​ ក៏បានប្រកាសថាខ្លួនបានស្រាវជ្រាវរកឃើញវ៉ាក់សាំង កូវីត១៩ដូចគ្នា ដោយបច្ចុប្បន្នវ៉ាក់សាំងនេះ បាននឹងកំពុងតែធ្វើការពិនិត្យមើលប្រសិទ្ធិភាព និងសមត្ថភាព នូវប្រភេទវ៉ាក់សាំងសម្រាប់ការប្រើប្រាស់ ប្រកបដោយប្រសិទ្ធភាព និងមានការវាយតម្លៃពីអង្គការសុខភាពពិភពលោក។

បន្ថែមពីនេះ នារសៀលថ្ងៃទី២០ ខែវិច្ឆិកា ឆ្នាំ២០២០ នេះ ឯកអគ្គរដ្ឋទូតប្រទេសអូស្រ្តាលីប្រចាំកម្ពុជា លោក Pablo Kang បានថ្លែងថា ប្រទេសរបស់ខ្លួន នឹងផ្ដល់ជំនួយវ៉ាក់សាំង COVID-19 ដល់កម្ពុជា នៅពេលដែលអង្គការសុខភាពពិភពលោក (WHO) ប្រកាសដាក់ឱ្យប្រើប្រាស់ជាផ្លូវការ នៅពេលខាងមុខ។

សូមបញ្ជាក់ថា​ បើទោះបីជាប្រទេសធំៗទាំង៣នេះ​ សុទ្ធតែអះអាងនៃការសម្រេចជោគជ័យក្នុងការផលិតវ៉ាក់សាំងកូវីត១៩​ យ៉ាងណាក៏ដោយ​ តែអង្គការសុខភាពពិភពលោក​ រួមទាំងស្ថាប័នពាក់ព័ន្ធនានាពិភពលោក​ មិនទាន់បានចេញសេចក្តីប្រកាសទទួលស្គាល់ថា​វ៉ាក់សាំងប្រទេសណាមានប្រសិទ្ធភាពឬក៏អត់នៅឡើយទេ។​ ដូច្នេះការរកឃើញវ៉ាក់សាំងកូវីត១៩ នៅតែស្ថិតនៅក្នុងមន្ទិលសង្ស័យ និងមានភាពស្រពិចស្រពិលនៅឡើយនៅះទេ៕​


- Advertisement -
- Advertisement -