web analytics
Friday, September 17, 2021

អស្ចារ្យមែន​ ពេលនេះជនជាតិខ្មែរដំបូងគេ បានជាប់ឆ្នោតជាសមាជិកក្រុមប្រឹក្សាក្រុង Long Beach នៃរដ្ឋកាលីហ្វ័រញ៉ា

អាចថាជារឿងមួយគួរឱ្យភ្ញាក់ផ្អើល និងរំភើបក្រៃលែង​​ក្រោយពីស្ត្រីជនជាតិខ្មែរមួយរូប​ គឺលោកស្រី Suely Saro បានក្លាយជាពលរដ្ឋអាមេរិក ដើមកំណើតខ្មែរដំបូងគេបំផុត ដែលបានជាប់ឆ្នោតជាសមាជិកក្រុមប្រឹក្សា ទីក្រុង Long Beach នៃរដ្ឋកាលីហ្វ័រញ៉ា ដែលជារដ្ឋមានប្រជាជនខ្មែររស់នៅច្រើនជាងគេ នៅក្នុងសហរដ្ឋអាមេរិក។

ព័ត៌មានដ៏គួរឱ្យមានមោទកភាពមួយនេះ​ ត្រូវបានចេញផ្សាយគ្រប់សារព័ត៌មានបរទេស​​​ ក្រោយពីលោកស្រី Suely Saro បានស្បថចូលកាន់តំណែងជាផ្លូវការ កាលពីថ្ងៃអង្គារសប្ដាហ៍នេះ​ដោយលោកស្រី Suely Saro បានលើកឡើងថា «ការដែលបានក្លាយជាពលរដ្ឋអាមេរិក ដើមកំណើតខ្មែរដំបូងបំផុត ដែលជាប់ឆ្នោតជាសមាជិកក្រុមប្រឹក្សាទីក្រុង Long Beach គឺជាមោទនភាពមួយ។ មនុស្សជាច្រើនធ្លាប់ទុកពួកយើង (ប្រជាជនខ្មែរ) ជាប្រជាជនដែលត្រូវការជំនួយ និងជាជនរងគ្រោះ។ ប៉ុន្តែ ពួកយើងក៏មានភាពចម្រុះ ដូចសហគមន៍ដទៃទៀតដែរ ដោយយើងអាចក្លាយជាមន្ត្រីជាប់ឆ្នោត ឬជាសិល្បករ… ហើយខ្ញុំមានអារម្មណ៍ថា ខ្ញុំត្រូវទទួលខុសត្រូវមិនត្រឹមតែចំពោះ ក្រុមគ្រួសាររបស់ខ្ញុំនោះទេ តែគឺដើម្បីសហគមន៍ទាំងមូល ដែលត្រូវបានការពារ និងការគាំទ្រ»។

គួរឱ្យដឹងផងដែរថា​​លោកស្រី Suely Saro មានអាយុ ៤០ឆ្នាំ និងជាសាស្ត្រាចារ្យម្នាក់មកពីសាកលវិទ្យាល័យរដ្ឋកាលីហ្វ័រញ៉ា (California State University) ក្នុងទីក្រុងឡូសអាន់ជែលែស បានចាប់កំណើតនៅឯជំរុំជនភៀសខ្លួនក្នុងប្រទេសថៃ បន្ទាប់ពីឪពុកម្ដាយរបស់លោកស្រី បានរត់គេចចេញពីរបបប្រល័យពូជសាសន៍ប៉ុលពត។ លោកស្រី បានតាមឪពុកម្ដាយមករស់នៅក្នុងតំបន់ Southern California នៅអំឡុងទសវត្សរ៍ឆ្នាំ១៩៨០ ហើយលោកស្រីបានរស់នៅក្នុងក្នុងទីក្រុង Long Beach ច្រើនជាងមួយទសវត្សរ៍មកហើយ​ រហូតទទួលបានតំណែងរដ្ឋដ៏គួរឱ្យមានមោទកភាពមួយនេះ៕

Incoming City Council member Suely Saro, will be the first Cambodian American to ever serve on the Long Beach City Council in Long Beach on Friday, December 11, 2020. (Photo by Brittany Murray, Press-Telegram/SCNG)


- Advertisement -
- Advertisement -